• కుల, ప్రాంతీయ దూషణలకు దిగారంటూ ఎస్‌ఎఫ్‌ఐ ఆందోళన.. వివరణ కోరిన వర్సిటీ
• ఉద్దేశపూర్వకంగానే నిందలంటూ పోలీసులను ఆశ్రయించిన ప్రొఫెసర్ విజయ రామదాస్
శేరిలింగంపల్లి, నవంబర్ 10 (సిటీటైమ్స్):
హైదరాబాద్ కేంద్రీయ విశ్వవిద్యాలయంలో ఓ అధ్యాపకుడి వివక్షపూరిత వ్యాఖ్యలు తీవ్ర దుమారం రేపాయి. చరిత్ర విభాగం అసోసియేట్ ప్రొఫెసర్ డాక్టర్ విజయ రామదాస్.. పరిశోధన పుస్తక అధ్యాయం సవరణల విషయంలో ఓ పూర్వ విద్యార్థిపై ఈమెయిళ్ల ద్వారా కుల, ప్రాంతీయ విద్వేషపూరిత వ్యాఖ్యలు చేశారని ఆరోపిస్తూ ఎస్‌ఎఫ్‌ఐ విద్యార్థి సంఘం నిరసనకు దిగింది. కెరీర్ నాశనం చేస్తామంటూ బెదిరింపులకు పాల్పడిన సదరు ప్రొఫెసర్‌ను తక్షణమే విధుల నుంచి తొలగించాలని డిమాండ్ చేస్తూ వర్సిటీ అధికారులకు ఫిర్యాదు చేసింది.
ఈ వ్యవహారంపై స్పందించిన వర్సిటీ యాజమాన్యం.. ఫిర్యాదును విచారణ కమిటీకి పంపి ప్రొఫెసర్ నుంచి అధికారిక వివరణ కోరినట్లు వెల్లడించింది. అయితే బాధిత వ్యక్తి పూర్వ విద్యార్థి కావడం, ప్రాజెక్టు వర్సిటీ వెలుపలి వ్యవహారం కావడంతో తమ జోక్యానికి పరిమితులు ఉంటాయని పేర్కొంది. మరోవైపు తనపై కావాలనే తప్పుడు ఆరోపణలు చేస్తున్నారంటూ ప్రొఫెసర్ సైతం విద్యార్థి సంఘంపై పోలీసులకు ఎదురు ఫిర్యాదు చేయడంతో వివాదం మరింత ముదిరింది.
