చదువులో ముందు… గుర్తింపులో వెనుక!

• కస్తూర్బా పాఠశాలల్లో శ్రమించే మహిళా ఉపాధ్యాయినీలకు ప్రభుత్వం పట్టించుకోకపోవడంపై విమర్శలు

వనపర్తి, సెప్టెంబర్ 07 (సిటీటైమ్స్): కస్తూర్బా గాంధీ బాలికా విద్యాలయాలు (KGBV) రాష్ట్రంలో ప్రతిసారి మెరుగైన ఫలితాలు సాధిస్తూ ఆదర్శంగా నిలుస్తున్నాయి. ఈ విజయాల వెనుక ప్రధాన భూమిక పోషిస్తున్న మహిళా ఉపాధ్యాయినీలకు మాత్రం సరైన గుర్తింపు దక్కకపోవడం విద్యావేత్తల్లో చర్చనీయాంశమైంది. ఉపాధ్యాయ దినోత్సవం సందర్భంగా ప్రతీ సంవత్సరం “ఉత్తమ ఉపాధ్యాయ పురస్కారాలు” అందించే ప్రభుత్వం, కస్తూర్బా పాఠశాలల్లో శ్రమిస్తున్న సిబ్బందిని పట్టించుకోవడం లేదని ఆరోపణలు వినిపిస్తున్నాయి.ప్రభుత్వ పాఠశాల టీచర్ల కంటే ఎక్కువ పని భారం ఉన్నా… కేజీబీవీ ఉపాధ్యాయులు మాత్రం కష్టానికి తగిన గుర్తింపులేక కలత చెందుతున్నారు. ఉదయం తొందరగా స్కూల్ చేరుకోవడం నుండి రాత్రివేళల్లోనూ విద్యార్థినులతోనే ఉంటూ నైట్ డ్యూటీలు నిర్వర్తించాల్సి వస్తోంది. హాల్డే డ్యూటీలు కూడా అదనపు భారం అయ్యాయి. అంత శ్రమ చేసినా ఉద్యోగ భద్రత లేకపోవడం, అతి తక్కువ వేతనంతో పనిచేయాల్సి రావడం వీరి రోజువారీ వాస్తవం.2007లో కేవలం 3,500 రూపాయలతో ప్రారంభమైన వేతనం, 18 ఏళ్ల తర్వాత కూడా కేవలం 26 వేలకు మాత్రమే చేరడమే కాదు, ఆరోగ్య భద్రతా పధకాలు, ప్రత్యేక సెలవులు వంటి మౌలిక హక్కులు కూడా వారికి దూరంగానే ఉన్నాయి. గత కొన్నేళ్లుగా నియమిత శ్రమ దోపిడీకి గురవుతున్నామని సి ఆర్ టీలు ఆరోపిస్తున్నారు.ఈ ఏడాది రాష్ట్రవ్యాప్తంగా ప్రకటించిన ఎస్‌ఎస్‌సి ఫలితాల్లో కస్తూర్బా విద్యార్థినులు రాష్ట్రస్థాయి ర్యాంకులు సాధించి ముందంజలో నిలిచారు. కానీ ఈ విజయాల వెనుక ఉన్న ఉపాధ్యాయుల కృషిని సన్మానాల రూపంలో గుర్తించేందుకు ప్రభుత్వం ముందుకు రాకపోవడం ఆవేదన కలిగిస్తోంది. జిల్లాలవారీగా కనీసం ఒకటి రెండు కేజీబీవీ ఉపాధ్యాయులను గుర్తించి సత్కరిస్తే విద్యా బోధనలో వారికి మరింత ఉత్తేజం కలుగుతుందని నిపుణులు సూచిస్తున్నారు.”బెస్ట్ టీచర్స్ అవార్డు అవసరం లేదు, మాకు బేసిక్ పే వేతనాలు ఇప్పిస్తే చాలు” అని ఉపాధ్యాయినులు విజ్ఞప్తి చేస్తున్నారు. ఇకనైనా ప్రభుత్వం స్పందించి కేజీబీవీ ఉపాధ్యాయుల న్యాయమైన డిమాండ్లను పరిష్కరించాలని వారు కోరుతున్నారు.